विद्युत तारेच्या स्पर्शाने अल्पवयीन शेतकरी पुत्राचा मृत्यू

टीम सिटी टाइम्स लाखनी : पालांदूर पोलिस ठाण्याच्या हद्दीतील मेंढा/भुगांव येथील अल्पवयीन शेतकरी पुत्राचा विद्युत तारेच्या स्पर्शाने मृत्यू झाल्याची घटना रविवार (दि.९) मार्च रोजी दुपारी १:३० वाजताच्या सुमारास झरप शेतशिवरात घडली.योगेश विजय दोनोडे (वय १७ वर्षे,रा.मेंढा / भुगांव)असे मृतक युवकाचे नाव आहे.

घटनेच्या दिवशी मृतक योगेश हा स्वतःच्या शेतात धान पिकाची रोवणी सुरु असल्याने आई व इतर मजुरांसह रोवणी करीत असताना शेतातील धुऱ्यावरील मोटार पंपाचा इलेक्ट्रिक वायर हाताने बाजूला करते वेळी विद्युत तारेचा स्पर्श झाल्याने चिखलाच्या बांधीत पडून जागीच मृत झाला.

याप्रकरणी पालांदूर पोलिसांना घटनेची महिती देण्यात आली. पोलिसांनी घटनास्थळ गाठून पंचनामा केला. त्यानंतर मृतदेह उत्तरीय परिक्षणासाठी ग्रामीण रुग्णालय लाखनी येथे पाठविले. शवविच्छेदनानंतर मृतदेह कुटुंबियांच्या स्वाधीन करण्यात आले.योगेश दोनोडे या शालेय विद्यार्थ्याच्या आकस्मिक निधनामुळे गावात हळहळ व्यक्त होत आहे.याप्रकरणी पालांदूर पोलिस ठाण्यात आकस्मिक मृत्यूची नोंद घेण्यात आली आहे.